اسمع وخذ مني نصيحه وتذكير
- مما أعجبتني ( نبطي عرضه قلطه)
- 6/12/2016
- 2347
- منقول للفائده
الشاعر : رائد العالي من الشعراء المعروفين جادة قريحته بهذه المنظومه الطويله و الرائعه والتي ضمنها العديد من النصائح والعبر قصيده فعلا تستحق الاعجاب والتقدير صح لسان الشاعر رائد ملايييين
***
إن كان حاديك الزمن والمقادير
الصبر للرجال يعطي مناعة
إسمع وخذ مني نصيحه وتذكير
طِيب الكلام اللي يفيدك سماعه
صوادف الدنيا ورود ومصادير
وافضل كنوز الوقت كنز القناعة
اللي كتبه الله على عبده يصير
صبراً جميل ودبرة الله مطاعه
مادمت من روس الرجال المشاهير
مايرتخي راسٍ شمخ بارتفاعه
بكره تبي تلقى العوض فالمخاسير
تاصل حبال الوصل عقب إنقطاعه
العافية تسوى كنوز الدنانير
والرَجل دايم نجدته من ذراعه
صكات بقعا لانصنّك طوابير
خلك كما ضلعٍ تقانب سباعه
شامخ شموخاً ماتهزه معاصير
لو هو محاصر بالخطر كل ساعه
صلف الهوا ماشدّد طويق والنير
والحر يقدم والرعاعه رعاعه
ساير زمانك وانتبه تعكس السير
خذها نصيحه من يراعيك راعه
ربعك حِزامك فالليال المعاسير
صدرك عليهم لايضيق إتساعه
قد قالو اللي يحكمون التعابير
ترى يد الله مع يدين الجماعة
حَذراك دينك لايجي فيه تقصير
لاضاع دينك ماش غيره طماعه
إبليس لو زيّن دروب المحاذير
أبعد عن اللي مايجوز إتباعه
عقب المنيه ماتفيد المعاذير
واللي يطيع إبليس ماله شفاعه
إشّر الرفيق اللي يعينك على الخير
وبيع الردي فالسوق بيع البضاعة
لازم يجي من صاحب السوء تاثير
يدوّر اللي يخشره في ضياعه
اللي يشيّل المسك ماينفخ الكير
ومن جالس المقرود ياخذ طباعه
كم من كبيرٍ بالعقل عمره صغير
وكم من كبير. بعقل سن الرضاعة
لاتستشير الا حكيم التدابير
رجلٍ تفيدك خبرته واطّلاعه
العاقل يشاور هل العرف ويشير
وكلاً على ماقيل حسب اقتناعه
الطيب يبدي فالوجيه المسافير
يبدي كما نوراً توهج شعاعه
يشفيك حراً لانهض كنه الطير
الطيب مزروعٍ بقلبه زراعه
في طلته تلقى السعد والتباشير
واليا نخيته قال سمعاً وطاعه
تلقى الكرامه عند ريف الخطاطير
وتلقى اللكاعه عند راع اللكاعه
مافالبشر مخلوق من غير تقصير
مير القيام يكون بالاستطاعه
واليا ظهر سرك لو يقال في بير
تراه مابه بير من غير قاعه
يبدي ويبدي به من الناس تزوير
حيث ان بعض الناس مثل الاذاعة
يصبح ... كما جمٍ ملته الغثابير
ويمسي طعام مروّجين الاشاعة
الظلم ظلمه في وجيه المعاثير
مايفلح الظالم ولو طال باعه
يلقى الجزا لو عقب طول المشاوير
سواة ماسوّاه واعظم شناعة
من دعوة المظلوم أحذرك تحذير
إليا رفع لله ... كف الضراعة
يجيب ربه دعوته دون تأخير
وأبو قناع يبين خافي قناعه
راع الحسد لو يندفع يمك مغير
خلك مع الله وتركه باندفاعه
كل الصعاب بعون ربي تياسير
من يتكل بالله ومَنْ كل راعه
قدمت لك عن واقع الحال تقرير
ببيوت شعراً فيه فن وبراعة
صدرتها من صافي الفكر تصدير
وحقوقنا ماهي حقوق الطباعه
وختامها مني تحية وتقدير
شاري خوي الطيب ماعاد باعه
عدد المقيّمين 0 وإجمالي التقييمات 0
التعليقات على المقالة 4
خلف المالكي18/9/2019
http://madarib.com/vb/showthread.php?p=198687
خلف المالكي18/9/2019
نبذه مختصره عن القصيده وقائلها وفي الاخير تقدم للمتلقي ما يوكد ان القصيده في الاساس للشاعر الفلاني انت تعرف ان النت اكثر المشاركات فيه منقوله ... تقبل خالص التحيه والتقدير .
خلف المالكي18/9/2019
http://www.mekshat.com/vb/showthread.php?698968-%ED%C7-%D5%C7%CD%C8%ED-%E6%D4-%DD%ED%DF-%DE%E1%ED-%DA%D3%EC-%CE%ED%D1-(%E1%E1%D4%C7%DA%D1-%D1%C7%C6%CF-%C7%E1%DA%C7%E1%ED-)&s=a5d654b82b6b26f403e46fbd461f4349
ناصر 18/9/2019
لمن هذه القصيده