الديره الي لها ذكرى ترى ماتروح

 

احيان تجد بعض الناس يحمل عليك في خاطره شي وانت تحاول ترضيه وتسأل وتتحرى عن اسباب الضيقه ولكن في الغالب لا تجد لها مبرر وانه يحاول يفتعل الزعل والضيقه وينطبق عليه المثل الذي يقول الشرهان يرضى والمتشيريه مايرضى.

***

***

من ضاق من راح لا ترجيه خله يروح
الضيقه الـفاضيه يا خُف ميزانها

الي يدوّر على الزله ونـقض الجروح
ويبحث عن المشكله من سد بيبانها

حتى على الضحكه ان قابلك وجهه شحوح
ما غير يـبحث عن الـضيقه وعنوانها

هذاك لا ترتـجيه ولا براه طموح
سفـينته فالبحر ضاعت بربانها

ياصاحبي مـانصينا غير وجهاً صبوح
وأهل النكاده عرفـنا نظرة اعيانها

أنا أعرف الي صليب الراس قرنه نطوح
الفارس ... الي يـود الخيل ميدانها

الونعم الي بنى للقاله أعلى صروح
بيوت نعرف مبانـيها وسيسانها

رجال ترقى على القمه وتاطأ السفوح
نعرف وصول المعـادن نعرف أثمانها

وأنا على الديره أسّكب كل عبره ونـوح
أشتاق وحضر من الغُربه على شانها

وإن شفت لي ناوياً ساري وبرقه يلوح
قلنا ..عسى يـسقي الديره ووديانها

الديره الي بها الكادي وريـحه يفوح
ونسّمة هواها . تذكرني بخلانها

الديره الي لها ذكرى ترى ماتروح
في ذكرياتي مزارعها وشيبانها

وفي ذكرياتي جـبالاً شامخات الوضوح
جبال ضمت رعاياها ورعيانها

ــــــــــــــــــــــــــــــــــــــــــــــــــــــــــــــــــ

للاستماع الى القصيده صوتيا :